ريما للشاعر احمد الغزاوى

[elmodamer]

ريـْمـَـــــــــا


ريما.... جارة من جيران القمر ، رماها القدر فى قلب الخطر وسط الشارع المهجور بعد نص الليل ، والعيون نعسانة وكل البيبان متقفلة ، وخطويها بترتجف ، والقلب صوته مسموع ، و ع الرصيف نايمه الديابه ، ديابه فى صورة بشر متخفيين ، ديابة صعرا نه ، م الخمرة سكرانة ، وريما ماشية وسط السكارى ، قصدي الديابة الصعارى.
وطلعت الشمس ع السّـكرانين ، مٌش شمس الصباح ، دى شمس ريما اللى نورها أجمل م الصباح ، كان نهار الدنيا مطلعش وهنا عز النهار ، وبدأت تصحى العيون وتشوف وقلب ريما مليان بالخوف ، والديب الكبير كبير السكرانين صحي وفاق ،وشاف ريما بعيون قبيحة ما تعرف الحيا ولا تخلى من النفاق ، شاف عنين متكحلين شاف شفا يف شاف خدود شاف عود ملفوف شاف كل حاجة ما عدا حاجة ، معدا قلب جوا منها كله حب وكله خير قلب عاش طول عمره يحلم بالأمان مستنى يوم لحظة سلام ، مستني الشمس تملى جدران البيوت تدفى الخدود تروى الورود توحد بلاد ملّـت م الوعود ،
وبعد ما شاف دا الجمال ــ سبحانه وهاب الجمال ــ بدأ يطمع وعينه تلمع ، وخطوة بعد خطوة تقرب المسافة ، ومن هنا تبدأ الحكاية حكاية عدد فصولها تلاتة الفصل الأول فى الشارع ، العين فى العين والمسافة معدومة ، والديب ظاهر بلون الخضار كله حياء ووقار ، وبدأ أول ما بدأ يدادى ويطيب ، وخرج من بين شفايفه كلام معسول يصيب ما يخيب ، قال يا بنتى أنا زى أبوكى ، وإن ماشالتك الأرض أشيلك بين جفونى ، والليلة هتكونى ضيفة اهل بيتى اللى هيراعوكى ويصونوكى . وتم المراد ووافقت ريما مفيش فى إيديها أى إختيار ، ومشى ومشيت معاه ، وسـلـّم يا رب م اللى ممكن تلقاه .
ويبدأ تانى فصول الحكاية ، المكان بيت يشبه بيوتنا القديمة ، القديمة قوى ، ويبدأ الشك يملى قلب ريما، البيت ده مش ممكن يكون بيت ساكن فيه أب وأم وأولاد ، وبدأت تحس بالغدر ، وبدأ الديب يخلع ثياب الخضار ، ويظهر لونه الحقيقي ، وبدأت إيده تلمس جسمها ، وبدأ يحاول معاها يمكن من خوفها تلين وترضى ، لكنه ميعرفش إن ريما مُهره حُره وما لها غير خيـّالها ، ولا يكفيها فى شرفها كنوز الدنيا وأموالها .
بالإيد والرجل دافعت عن نفسها ، لكن القوة الغشوم كانت اقوى منها ، صمدت لكن انهارت ، دافعت لكن خسرت ؛ خسرت حياة رخيصة وكسبت أغلى ما فيها ، شرفها ودينها ورضا الرب عليها . ويطلع النهار على ريما وهى جسد ميت بلا روح والديب المكار بعد ما انتهت شهوته من جسد ميت اصبح هو كمان من الأموات ، وفضل يصرخ ويبكى أيام من ألم فى الدماغ ، ومات بعد ما شاف ألوان المرار علشان يشوف عذاب المنتقم الجبار" ويـَمْكرُنَ وَيمكـُرُ الله ُ والله ُ خَـيرُ الماكِرِين" .
الفصل الثالث والأخير م الحكاية ممكن يكون هنا او هناك بعيد او قريب ، دلوقتى أو بعدين ، فـَصل ما لوش نهاية ، ولا حد فاكر له بداية ، فصل زى ماهنلاقى فيه جارة جديدة من جيران القمر هنلاقى فيه ديب جديد من ديابة البشر هىّ الحياة دايماً كده ، فيها كده وفيها كده ، يا رب اجعلنا كده وإبعدنا عن كده.


تمت بحمد الله...... .
أحمد الغزاوي

[Mr.Mostafa]

بارك الله فيك اخى الغاااااااااااااالى

[ناصر ابو محمد]

الف الف شكر اخى الغالى
عمل رائع

[Mr.Mostafa]