فـــــــــــــــــؤاد حــــــــــداد

[فارس العايدى]

فؤاد حداد

فؤاد حداد من أبرز شعراء العامية في منتصف القرن العشرين ، فهو المؤسس الحقيقي لشعر العامية الملحمي في مصر، وكان دائما ما يعرف نفسه قائلا: أنا والد الشعراء فؤاد حداد.

أطلق عليه كذلك فنان الشعب ، حيث استلهم من الشعب المصري ، عدد من الملاحم التي كتبها، مثل (أدهم الشرقاوي).


سيرة حياته
ولد فؤاد سليم حدٌاد بحى الظاهر بالقاهرة ، والده سليم أمين حدٌاد ولد في 5 يونيه 1885 في بلدة 'عبية' بلبنان في أسرة مسيحية بروتستانتية لوالدين بسيطين اهتما بتعليمه حتي تخرج في الجامعة الأمريكية ببيروت متخصصا في الرياضة المالية ثم جاء الي القاهرة قبيل الحرب العالمية الأولي ليعمل مدرسا بكلية التجارة* جامعة فؤاد الاول * ويحصل علي لقب البكوية وعندما تنشأ نقابة التجاريين في مصر تمنحه العضوية* رقم واحد ، ومازالت كتبه وجداوله تدرس باسمه حتي الآن.

أما والدته فهي من مواليد القاهرة في 19 يونيه 1907م جاء أجدادها السوريون الكاثوليكيون الي مصر واستقروا فيها وولد أبواها في القاهرة. أبوها من عائلة أسود التي جاءت من دمشق الشام وأمها من عائلة بولاد من حلب ، و في المعتقل تحول " فؤاد حداد " إلى " الإسلام " .

تعلم في مدرسة الفرير ثم مدرسة الليسية الفرنسيتين ، وكانت لديه منذ الصغر رغبة قوية للمعرفة والإطلاع على التراث الشعري الذي وجده في مكتبة والده ، وكذلك على الأدب الفرنسي من أثر دراسته للغة الفرنسية.

اعتقل فؤاد حداد عام 1950 لأسباب سياسية ، ثم عاد واعتقل مرة أخرى عام 1953.

نشر حداد ديوانه الأول "حنبني السد" بعد خروجه من السجن عام 1956 ، واعتقل مرة أخرى عام 1959 لمدة خمس سنوات ، وخرج ليكتب في شكل جديد لم يكن موجودًا في الشعر العربي ، وهو شعر العامية فكتب أشعار الرقصات مثل "الدبة" و"البغبغان" و"الثعبان" وغيرها.

كتب "المسحراتي" لسيد مكاوي 1964 وكتب له البرنامج الإذاعي "من نور الخيال وصنع الأجيال" 30 حلقة عام 1969 والذي كانت أغنية "الأرض بتتكلم عربي" قطعة منه.

أصدر 33 ديوان منها 17 ديوان أثناء حياته والباقي بعد وفاته ولابنه الأكبر هو الشاعر أمين حداد ، وهو يعتبر أحد الشعراء الذين خرجوا من عباءة والده مسحراتي الشعراء ، وله ابن آخر هو أيمن حداد ويعمل في مجال المسرح.


الأعمال الشعرية
كان ديوانه الاول "احرار وراء القضبان" عام 1956 ثم "حنبني السد" 1956 ومن أهم دواوينه "قال التاريخ انا شعر إسوَد".. ديوان ترجم فيه الشاعر مختارات من الشعر الفييتنامي 1968 ، "المسحراتى" 1969.

ومن أبرز القصائد التي كتبها ضمن تلك السلسلة: سلام ، وحسن أبو عليوة ، الاستمارة ، الكحك ، النسمة هلت ، والله زمان ، يا هادي ، بعلو حسي ، افتح يا سمسم ، في الغيط نقاية ، عنتر ، ألف باء ، هلال ، حرفة هواية ، التبات والنبات ، دواليب زمان ، على باب الله ، الارض بتتكلم عربى.

كلمة مصر 1975.
من نور الخيال وصنع الاجيال في تاريخ القاهرة 1982.
استشهاد جمال عبدالناصر 1982.
الحضرة الزكية 1984.
الشاطر حسن 1985.
الحمل الفلسطيني 1985.
أشعار فؤاد حداد ويضم خمسة دواوين 1984 ، وكذلك ميت بوتيك ، وياأهل الامانة ، أيام العجب والموت ، ويوميات العمر الثاني – ديوان أم نبات حققه فؤاد حداد وغيرها..

إلى جانب قصة الأمير الصغير لأنطوان دي سان إكزوبري التي ترجمها عن الفرنسية إلى مسرحية غنائية بالعامية المصرية.

وله أعمال أخرى منها:

أدهم الشرقاوي
حسن المغنواتي
أم نبات
مرآة الصوت
أنا الأديب وأبو الأدبا ...
اسمي بإذن الله خالد ...
وشعري مفرود الرقبة
زي الألف ...
ورقم واحد ...
والساعة 6 في العتبة
.أشعر شعراء العامية على الإطلاق
هو فؤاد حداد ...

قامة فارهة في الشعر العامي … تعلم الكل منه …
هو فؤاد حداد ...

أول شاعر طبع ديوانا بالعامية المصرية عام 1947

أدهش الكبار - اكبر الكبار - بيرم ... رامي … جاهين ... الأبنودي … حجاب ... نجم ... عبد الباقي….

يقول عنه بيرم التونسي : لا احد أشعر من فؤاد حداد

يقول صلاح جاهين : أنا تلميذ فؤاد حداد

هذا الشاعر الذي هاجم أنظمة الحكم الديكتاتورية ودفع ثمن ذلك في ظلام السجن سنينا عدة

... هو فؤاد حداد


" فؤاد حداد اختار كل حاجة،
كُتب عليه أن يختار كل أموره يعني إحنا في حاجات ولدنا بها وما فكرناش فيها كثير ومستمرة
هو كتب عليه أن يفكر في كل الأمور ويغير كل الأمور،
يعني اختار الوطن
واختار الدين
واختار الانتماء للطبقات الشعبية وهو ابن عائلة طبقة وسطى مترفة،
كانت عائلة كبيرة لأن والده كان أستاذ جامعي
وكان ماسك محاسبة البنك الأهلي كله فما كنش يتصور
إن هو هيطلع من هذا البيت هذا الشيوعي
وعلى فكرة فؤاد حداد كان بيحب يقول أنا شيوعي ... مسلم ويصلي وكل حاجة
لكن أنا شيوعي ما فيهاش هزار ويزعل جدا لو حد قال حضرتك يساري لا، لا أنا شيوعي
فاختار الانتماء للطبقات الشعبية اختيار لم يعد عنه إطلاقا
حتى إذا العائلة زعلت إذا غير و أصبح مسلم وهو كان مسيحيا وأصبح مسلما،
انتماءه للطبقات الشعبية حتى وهو بيمدح الرسول عليه الصلاة والسلام
كان بيقول
يا جموع الفقراء
يمموا غار حراء
سيرى هذا التراب
بعيون لا تراب
عسجديا مسجديا
طأطأت فيه الحراب
يعني كان يحب في الدين أن الدين إنصاف الفقراء
وكان يحب الماركسية أنها إنصاف للفقراء
وكان يحب في الإنسانية أنها إنصاف للفقراء
لم يكن يعرف إلا الشعر وإنصاف الفقراء."

[فارس العايدى]

واحد من اتنين ما يعجبوش العجب
كلامى فى إن الفاضى
قبل المعاش يعمل قاضى
يقعد على القهوه قصادى
يُطلُب عجمى
و يقول عجبى
أنا بالعربى
كدا مش راضى
مش راضى عن أيها حاجه
أيها حاجه
لا التربيه ولا التوعيه
و لا أغنيه عن الزراعيه
و لا بنت تركب دراجه
و لا الشئون الاجتماعيه
تصرف اعانه لمحتاجه
و لا طابور الجمعيه
و لا السمك فى التلاجه
و أقول له نهضه صناعيه
يقول لى ايه يعنى يعنى
سمعنى صوتك سمعنى
يُطلُب عجمى
و يقول عجبى
أنا بالعربى
كدا مش راضى
والسد علاّه البَانى
بيعجبك – لأ يا إبنى
مخدته مش عجبانى
و لا الستاره بتعجبنى
ما فيش و لا حاجه بترضيه
لا قولة الشعب العامل
و لا نزع ملكية اراضيه
بكل ذوق و أدب كامل
المستفيد المتحامل
ما يعجبوش كل الذى فات
ما يعجبوش كل الذى جي
ما يعجبوش سوبر فوسفات
و لا الهرم بالصوت و الضي
و بس قادر يستحمل
يفضل يعيش فى بلد تهمل
المسرح الاستعراضى
يُطلُب عجمى
و يقول عجبى
أنا بالعربى
كدا مش راضى
لا مينى عاجبه و لا ماكسي
و لا التروللى و لا التاكسي
إن قلت لأ يقول ايوه
طلبت شاي يطلب قهوه
شمال يمين على طول عكسي
ان قلت له مثلاً مثلاً
الدنيا حر – بقى لى زمان
يقول نجيب الدفايه
و ان قلت له مثلا مثلا
- ما اشبعش من صوت الكروان
و اقول لثومه اعد و كمان
اقفل لنا الراديو كفايه
-الحق واضح – لأ غلطان
يا ابنى دا كله خفايا
-الشعب ضدك و هو الآن
- الشعب سُذج و حَفايا
-ما تتحمقش جتك غليان
باين على وشك زعلان
-اللى انت شايفه دا قفايا
اِلْزَقْ عليه آخر اعلان
عن اللى عايش فى الماضى
يُطلُب عجمى
و يقول عجبى
أنا بالعربى
كدا مش راضى

[فارس العايدى]

شق الكيعان
شوف اللي ماشي متشعبط
قال دا اللي ماشي مش أعبط

راكب يقول أما حكايه
و قصه لسه بلا نهايه
الكمساري دا اللي معايا
سمحت له يتريق لي
قام حَط عقله في عقلي
و قلت رأيي و قال رأيه
و اصواتنا عليت في الراديو
مين اللي فينا بدأ يغلط

شوف اللي ماشي متشعبط
قال دا اللي ماشي مش أعبط

الكمساري قال يا اسيادي
و طبعي و ياكم هادي
أما الصغير زي ولادي
أما الكبير أهو دا عمِّي
دمه إن غلي ما غليش دمي
أما اللي جِيلي من جيله
أول ما يزعل أنا اجي له
و اناوله ضحكه و ادي له
من الكلام اللي يِهَبَّط

شوف اللي ماشي متشعبط
قال دا اللي ماشي مش أعبط

من بعد ما طلع الطلعه
و شايل اقفاصه مرابعه
و معاه عيال آخر طبعه
سأل سؤال و جاته اللوعه
لطم و قال يادي الواقعه
بَقى دا تمانيه مش سابعه
بقى يعني مش رايح القلعه
أتاري ودني ماهيش سامعه
ودماغي في السقف بتخْبَط

شوف اللي ماشي متشعبط
قال دا اللي ماشي مش أعبط

الكمساري قال آه ياني
أزعق بصوتي الحيّاني
و أشق فيكم بكيعاني
وعيني تمشي مع وداني
وليه بقى يا أخواني
فيه ناس هنا مش سامعاني
و ناس كمان مش شايفاني
لازم أنا واحد تاني
و ناسي نفسي و متلخبط

شوف اللي ماشي متشعبط
قال دا اللي ماشي مش أعبط

[فارس العايدى]

طقطق سلام
آه يا حماتي يا حياتي
يا طيبه زي حالاتي

مالك يا بنتي يا روح بنتك
مالك يا نينتي يا روح نينتك
خسْست نفسي و سمّنتك
أكلت حته من كبدي
مبطنه بالحنّيه
حب الضنى يشفي و يهدي
اتهنّي يا متهنيه
وهاتي بوسه و خُدِي بوسه
أيوه كدا قُوُلِي قولي
يا أم طيري و زغلولي
يا حنجره فضه و لولي
يا جوهره تزين الجوهري
الراديو فاتح ع البحري
سمع صواتك و صواتي

آه يا حماتي يا حياتي
يا طيبه زي حالاتي

ولسه جايّه من الصاغه
و لسه قاعده كمان ساعه
وهاتي بوسه و خدي بوسه
و خمسه فل على نهارك
أحلى الحلاوه من نارك
تعالي يا اختي نتعارك
يا لهوتي أما دي لهوه
شربت من إيدك قهوه
ابنك يا نينه حيتعود
نود بعض و نتودود
طقطق سلام و سلام طقطق
لعب الحواجب على أَصلُه
الحق ما يحطش مَنْطَق
لمّا الفنون تترقص له
و أنا الأديب الأدباتي
تلت التلاته يا اخواتي

آه يا حماتي يا حياتي
يا طيبه زي حالاتي

بنت الحلال يا مصفيه
كل اللي فيكِ هاتيه فيّه
الأوله فارده ملايه
من الأغاني العاطفيه
و التانيه فحله و بطلايه
في الشر زي الحنفيه
و هاتي بوسه و خدي بوسه
من إنكساركم يا وَلاَيَا
الشاشه راحت مطفيه
و أنا الأديب الأدباتي
حلقت آخر شنباتي

آه يا حماتي يا حياتي
يا طيبه زي حالاتي

[فارس العايدى]

لَوْلَب ياباني
كلامي عن أعظم مَعْرَض
بايت و صابح مستورد

أصل الحكايه و كان ياما كان
اليافطه في صدر الدكَّان
مكتوب عليها نَتحَدَّى
بحرف دال وعليه شَدَّه
أَكِنّ بحر من المهاويس
عمّي الأشارجي فتح له هاويس
راح الميدان مشفوط شفطه
و كلّه طاير ع اليافطه
و طرت أنا حركات بركات
و شفت في البترينه حاجات
منظرها وَحْدُه موسيقى
مقامها بمقام السيكا
أشكال و ألوان بتزغرد

كلامي عن أعظم مَعْرَض
بايت و صابح مستورد

الفن راح نُصه تجاره
و العين لازم لها نظاره
والكهل مش قادر يِسْلَى
أيام ما كان ياكل نِسْلَه
ومعلقه فضه و شوكه
و معلقه صيني و تُوكَه
و مرايه من جوه مرايه
حتى الباروكه بفَلاّيَه
فن التجاره صحيح يِخْيِل
خلَّى العجوزه تستعْيِل
خلّى المريضه تستمرض

كلامي عن أعظم مَعْرَض
بايت و صابح مستورد

يا دنيا مالك يا دنيا
يا دبابات جنب كولونيا
يا ألف صنف و تفنينه
آه يا اللي ريقنا يجرينا
يا محَوّدين ع الناحيه دي
يمكن رفوف البترينه
طياره تضرب أولادي
سَرَّحت قلبي على الوادي
و لبست من مصر نسيجها
وفُلَّها و بنفسجها
إنتاج بلادنا جميل جداً
و الديك جميل اللي بيدن
على الغيطان الوطنيه
من غير لوالب يابانيه
و انقر يا منقار زغلولي
جميزة الخاله سنيّه
انقر بِسنّه دهب لولي
وسنّه ضحكت بمجرد

كلامي عن أعظم مَعْرَض
بايت و صابح مستورد

[فارس العايدى]

خُنْفِس
أبوعلى : كلامي في حِنْجِل بِنْجِل
زي الغراب ماشي بيحجِل

يا واد كأنه صَبَح وَادَه
و كان فؤاد و بقى فؤاده
يا مستفيد فوق العاده
من حُب ماما في المنزل

و بابا بابا ما يتعيّب
طول عمره راجل متجيّب
و لار? في الأفكار ديّه
و ??ور كمان في التربيه
فايت قديمُه لجديدُه
من غير ما حتى تبوس إيدُه
من إيده يومياً تقبض
و ليه بقى يا ولد يا ابيض
لابس خانفسي و مبهدل ؟

الخُنفس : ألبس مبهدل و خَنَافْسِي
يا عم أنا حر في نفسي
أسَلِّي كيفي و اشوف طقسي
لا عقلي ناقص و لا زايد
ما احتاجش أُومُو و لا تَايِد
لعب الشباب كلُّه فوايد
و مخ جيلي ما هوش مخجل

أ ع : الواد عيونه بَصَّاصه
بالغدر تحدفني رصاصه
لاقُصّ بمقصي قُصاصه
من شَعر راسُه اللي مُهَدَّل

خ : يا عم مين عملك قاضي
كل الفلاسفه في الماضي
رَخِتْ شُعورها و لحيتها
و لا حد قرب ناحيتها
يا عم إنت إيه صفتك ؟

أ ع : الشَعر يعني فلسفتك
شمشون فتك سقراط أفتك
بتتعوج و الاّ بتعدِل

أ ع : يا إبني دا لزوم اللحيه
الفيلسوفه تكون بيضا
فَقَسْت إمتي من الدحيه
طلعْت إمتي من البيضه
مش غايته أوِّلة إمبارح

خ : باين ما بتروحش السيما
كل الكلام دا مالوش قيمه
يا عمّ عمّ يا عمّ انت
باين عليك دَقَّه قديمه

أ ع : باين عليك مَيَّه جَتك غمّ
مافيكش ريحة ريحة الدمّ
إوعك تقولي تاني يا عمّ

خ : حاضر حاقولك يا أُونكل

أ ع : فاكرلي نفسك واد خفَّه
يا خنفس أخنف يا أبو شِفّه
روح يا غبي شوفلك حِرْفَه
بِدال ما تمشي تِتْقَصَّع
شوف الأيادي في المصنع
شوف اللي بتشيل المدفع
إيدين بتحمي أوطانها
و إيدين بتزرع في غيطانها
و ناس بتمشي مع شيطانها
زَيَّك و زَيَّك تستندل

[فارس العايدى]

الواقع في الواقع
في ألف ليله قمر لالا
و السندباد و الدَلاَّلَه
الشرق روحاني ؟ لا لا
كلام ما بيعمرش المُخ

الشرق روحاني مُتّزِن
كمثل سيف بن زي يَزن
آدي الكلام اللي يتوزن
و اللي يقول غير كدا بيْجُخ

أنا امّا جيت أرقص رقصه
سيف جابلي قافيه كانت ناقصه
طاير على جناحات عاقصه
جنّيه ما يطولهاش الرُّخ

دي تبقى رقصه خياليه ؟
لأ يا وَلِي و لأ يا وليه
دي سرحتي في غيمه عليّه
لكن دي حَتْمَطَّر و ترُخ

للفن جانب أمريكي
عشان كدا أنا تكتيكي
و إن كنت أحمر طاخ طيخي
لازم أتكتك قبل ما اطخ

و ان كنت أنا أحمر فاقع
طول عمري واقع في الواقع
سيف بن زي يزن الرائع
صاحبي من ايام دَح و كِخ

سيف بن زي يزن الشرقي
على خيال فوق المرئي
على جناح عاقصه البرقي
قال نزليني عايز اشُخ

[فارس العايدى]

النقط فوق الحروف
أنا الأديب المتفقِّه
ما زلت أبكي و أُقَهْقِه
ما ضاق قلبي من دَقِّه
لكنُّ بَعْضَهُمُو ضاقا

يريدني إذْ أنا أهزج
أن استخف و استسذج
فلا أُقيمُ و لا أمزج
حساً بفكرٍ إِطلاقا

ما شاء فليقُل البعضُ
ما شاء أنملُهُ البضُّ
إني لأعلم ما البيضُ
كمن يقيس الأعماقا

ألا لكل من انتكسا
أظلَّ بيضاً أم فَقسا
قلبي تعلمكم فَقَسَا
و كان سماً ترياقا

إن ضل قوم أو تاهوا
ما ضل شِعري مأتاهُ
تَنَفَّسَت قافياتاهُ
حريتي و الآفاقا

هذا لساني لن يعيا
لي أن أقول به الرأيا
لي أن أعيش و أن أحيا
و الشمس تشرق إشراقا

أقولُهَا ، لا أتَّئِدُ
لن تستطيعوا أن تئدوا
بنات قلبٍ يجتهدُ
و يستعيد الميثاقا

[فارس العايدى]

بالناقص يا سيدي
لا بدّ واحد يتفنن
لحدّ غيره ما يتجنن

شحات يقول حسنه يا سيدي
كفايه مديت لم إيدي
ما تتحوجشي لضروره
وتشوف ولادك مضروره
و لا مريضه و ممروره
و لا سئيله و مُلِحَّه
يا افندي يدِّيك الصحّه
بتقول حالتنا ما تفرقشي
عوّمت فشتي على كرشي
يا افندي اضحك اضحك لك
عشان تشوف شكلي و شكلك
أهتم أنا و انت مسنّن

لا بدّ واحد يتفنن
لحدّ غيره ما يتجنن

الافندي قال هي سناني
تنفعني إيه هو أنا حَاكْلَك
من كتر غلبي و حناني
أنا ماليش قلب اضحك لك
عينك يا اخويه تشوف بيتي
دا أنا موظف كحيتي
الشهر كلُّه عرق و شقا
بلاش فضيحه كفايه بقى
آدي كل واحد قال رأيه
و اصوتنا عليت في الراديو
و الناس لابدّ حتتبيّن
مين اللي فينا متحيّن
مين اللي حاله بتحزّن
مين اللي كان حقه يحسّن
لاخوه بدال ما يتمسكن

لا بدّ واحد يتفنن
لحدّ غيره ما يتجنن

شحات يقول بقى دي عمايل
بقى لي ساعه باتحايل
و امدّ إيدي مش طايل
و الدنيا فينا بتتخايل
الفن عندك مش عندي
ما تحط كلمه يا الافندي
الافندي قال أنا مش قايل
ضحت له و قلت له هايل
تمثيلك البخت المايل
يا افندي روح الله يحنّن

لا بدّ واحد يتفنن
لحدّ غيره ما يتجنن

[فارس العايدى]

أدب و دنيا
أنا الأديب أبو الأدبا
إسمي بإذن الله خالد
و شِعري مفرود الرقبه
زي الألف و رقم و احد
و الساعه سته في العتبه
و مسله من عهد تحتمس
واقفه بتَحَدِّي و تَحَمُّس

لكن أنا داير داير
داير بشِعري اللي حيلتي
داير على ولادي و عيلتي
و استفعلــي يا تفعيلتي
و خُشّي مُولِد بلا حُمُّص

نزور ضريح سيدي الرََّمّه
وست كان اسمها زمّه
في دنيا من حيث العِمّه
نهارها شيخ و الليل قُمُّص

يا لهوي منها و يا لهفي
مِن ناس بترطُن بالصَحَفِي
و ناس تقول و حياة شرفي
عشان عشا و عشان تُخْبُص

و أنا الأديب المُتَأَدِّب
غلبان وفني المُتَغَلِّب
ماكانش قلبي مُتَقَلِّب
و لا قميصي لِتَقَمُّص

و لا حرامي بيخَرْوِش
بضفر ناعم و يخربش
ما بين عيون صاحيه تبربش
و بين عيون نايمه بتعْمُص

[فارس العايدى]

استيفا
حَقَّه يا لأه مسيرك آه
زي الوزَّه ما قالت كاه

أول كلمه الكَتَبَه كَتِيبه
شالوا زكيبه و حطّوا زكيبه
الدنيا الدواويني عجيبه
حَقَّه ...
قال أنا خادم بس مخاوفي
ليكون ورقك مش مستوفي
أو فيه مانع أو فيه ، أو في
حَقَّه ...
منتظرين تأييد الفتوى
صبرك لمّا تاخد لها غلوه
نتثبت نتقدّم خطوه
حَقَّه ...
آخر كلمه حنجري معاينه
نفتح محضر إمتى و أين
مانخليش الحق علينا
حَقَّه ...

[فارس العايدى]

واحد تاني مش فاهم
و التاني ده منتوش نَتْشَه
حَلَنْجي و يخُش مُنَاقشه
في ديل فَرَس أصلُه مَنَشَّه
و يثبت إن العكس صحيح

يقول دي مَرَّه و مرحومه
كانت قصايدك مَتْهُومه
و قُلْت غامضه و مفهومه
ما قُلتش إن الصُلب حديد

عايزني أَفَرّق بين (( غامضه ))
يقولها هو و بين (( غامضه ))
يقولها غيره و ألآبَنْضَه
و كدب كدب و كدب صريح

أَطَمّنَك يا مطمّني
تعرف تقول أحسن منّي
زي اللي غيرك خامينني
إكمني عيّ و إنت فصيح

و الشمس شمس الظهريه
فيها عوامل تعريه
و الدوامات الذريه
الشمس محتاجه لتوضيح

[فارس العايدى]

و في تاسع دور
إحنا اللي قاعدين ع المكتب
تسع دكاتره بمرتب
تسعين دكتــور

تحت القزاز أُفقي و رأسي
القاهره نايمه عَرايسي
منظر و ديــكور

يحيا المزاج الوطواطي
السرّ سرّ في بير واطي
شغّال بمــوتور

حَسَن سلوكنا حَسَن سيرنا
أما الطلوع فأسانسيرنا
و علينا الدور

و الدنيا لسه حتتزلزل
أما النزول زيّ ما تنزل
لقمه من الزور

أما نزول غيرنا فَأَكِد
ما هوش هزار و لا بَنَكِت
وعد يا بلفور

نختم على غيرنا ونطبع
أما الطلوع زي ما يطلع
من روحه التور

خليك يا واد إنت و هوّه
في الهِوّ بالعربي الهوّه
بتمثل دور

[فارس العايدى]

الحلو ما يِكْمَلْش
كمان كمان هات لي و هات لي
الشابه ناويه على قتلي

الشابه دي قبل ما اطرشق
عشقتها زي ما يعشق
واحد موظف فبراير
كانت قمر لابسه حراير
مشجَّره و مهراجنيّه
أما الخدود فجناينيه
و أما بُقها شربتلي

كمان كمان هات لي و هات لي
الشابه ناويه على قتلي

الشابه قالت عايزه لي
أربع مطارح لعْزالي
في حته شيك و جيران أشيك
عشان أكيد في عُذّالي
و أفرح أكيد و الاّ في رأيك
ما باستاهلش ؟ بتستاهلي

كمان كمان هات لي و هات لي
الشابه ناويه على قتلي

قالوا لي على واحد مالك
في حي قال اسمه زمالك
نظر في وشي و انا في رجليه
قال لي يا سيد قلت : يا بيه
كفايه أربعه ! أربعه إيه ؟
يا ابني أربعه ألف جنيه
شهقت آه بكرر لي عينيه
و قال لي فكّر و ابعت لي

كمان كمان هات لي و هات لي
الشابه ناويه على قتلي

الشابه لأ ما عجبهاشي
كلامها إيه قال مش ماشي
من بعد حنّيه و رقّه
بانت سنانها المزرقّه
قعدت تهاتي و تتفاخَر
و سمّعتني كلام آخَر
آدي كل واحد قال رأيه
و اصوتنا عليت في الراديو
الله بلطفه يتولّى
اللي في غرامِك يتولّه
و يلاقي بيت على طبطابك
الله يكسب خُطّابك
و أنا أَدَوّر على مهلي

كمان كمان هات لي و هات لي
الشابه ناويه على قتلي

[فارس العايدى]

يوماً فيوماً
أنا الأديب أنا القافي
و قد أُقَفِّي بالقافِ
ثقافة صنع ثقافي
تَسَامَحَتْ مَعَهُ الفصحى

أما الغراب فقافاه
صوتٌ له أشقى فاه
فاجعل إلى البين قفاه
و أخلص الأدب النُصْحا

يا أيها الفرد القائل
أنا الأديب المتفائل
اذكر من الليل أوائل
رأيت منهنّ الصُبْحا

و الشمس تشرق إشراقا
على دمٍ كان مُرَاقا
اُختٌ تنادي البرّاقا
حتي يرى جُرْحاً جُرْحا

سَيُدْرِك الشمس أخوها
يا جلدها إن سلخوها
يا آية إن يمحوها
يوماً فيوماً لن تُمْحَى