ازاى تعرف انك اتربيت فى البيت العائلى

[الصقر54]

على مدى سنوات الطفولة و المراهقة يقطع الابن والابنه منزل اسرته رايح جاى وهو يستمع للنصائح والتوجيهات نفسها و التوبيخ نفسه بأساليب وجمل ثابتة لا تتغير .. حتى اصبحنا بمرور الوقت نحفظها جيداً ونتوقعها ..

واسترجاع هذه المقولات " التى لا تسمعها الا فى البيت المصرى " يبعث فى الوجدان قشعريرة ما مصحوبة بالكوميديا

، و يعمق محبة اهالينا فى القلوب ، ويجعلنا نكتشف كم الهستيريا و القلق والمسئولية التى تكبدها الاهالى فى سبيل ان تقف فخوراً برأى الناس فيك
"شكله ابن ناس .. ومتربي"

اشهر 53 جملة بيقولها الاب و الام فى مصر ..

............ ......... ..

- مش عايزة اسمع صوت ..
وفى هذه الجملة تدريباً مبكراً على تقبل القمع و الديكتاتورية اللذين ستواجهمها طوال حياتك ..

- ماتردش عليا ..
وهى نصيحة اذا التزمت بها ستكسب مديرك فى العمل ..

- تقعد فى اول صف قدام السبورة ...
وهى جملة تعودك على ان تكون فى المقدمة دوماً ..

- لو مش فاهم حاجة ارفع ايدك وقول للاستاذ مش فاهم .. ماتتكسفش ..
فاكرين المدرسين زى اللى على ايامهم زمان ..

- ما تتأخرش بعد المدرسة وتقعد تصيع مع اصحابك ..
وهى نصيحة ستحقق لك قدراً من السعادة الزوجية فيما بعد اذا تعودت على ان تكون رجلاً من الشغل للبيت ..

- اللى بيشيل قربة مخرومة بتخر عليه لوحده ..

- ومالها الكتب بتاعة الوزارة ؟!

- بُص كويس وانت بتعدى الشارع ..

- مافيش مذاكرة على المزيكا .. او .. بتذاكر ازاى والبتاع ده شغال جنبك

- ماتمشيش حافى فى السقعة دى

- صليت العصر ؟!

- ربنا يهديك .. ربنا يهديك ، واحياناً .. انك لا تهدى من احببت

- اطفى التليفزيون وقوم ذاكر ..او .. اطفى التليفزيون وقوم خُش اوضتك

- اوعى تقول لحد هاتلى حاجة

- اقفل صدرك

- بلاش وقفة الشبابيك والبلكونات

- كُل على مهلك .. وامضغ كويس .. وماتكلش وانت واقف وكل من قدامك ماتحفش

- كفاية رغى فى التليفونات ..

- ماتقعدش قدام المروحة وانت مستحمى

- المسلسل مش هاينفعك ... قوم

- وانت فاكر احنا مستنين منك حاجة ؟!

- ماتعليش صوتك ..

- بلاش لعب فى الشارع

- يا ابنى اللى ذاكر ذاكر خلاص .. قوم نام

- بلاش لعب بالمقص .. بيجيب الفقر ..

- يابنى كلم خالتك العيانة اسأل عليها

- اوعى حد غريب يديلك حاجة تاكلها ولا تشربها وتاخدها منه

- النوم لحد الضهر بيجيب الفقر

- اوعى تكدب عليا تانى مرة

- لازم تاكل سلطة

- لو شفت خناقة مالكش دعوة بيها

- عيب .. لازم تحترم الاكبر منك

- كلمنا لما توصل

- مالكش دعوة بالسياسة

- بلاش اكل بره

- ماتلبسش القميص على اللحم زى العيال الصايعة

- يا ابنى انت مسطول ولا ايه ؟!

- انت فاكرنا نايمين على ودانا ؟!

- وطى المدعوق ده شويه

- قوم اقرالك كلمتين ينفعوك

- ايه اللامبالاه و الاستهتار اللى انت عايش فيهم دول

- انت فاكرنا لاقيين الفلوس دى فى الشارع

- والله مانت فالح .. وآدى دقنى اهه ..

- ماتتكلمش بصوت عالى فى الحمام

- ما تنامش غير لما تغسل سنانك

- ماتلزقش فى التليفزيون كده .. نظرك هيضيع

- ضرب امثلة تشجع على الكفاح واشهرها " احد الاقارب اللى كان بيذاكر على لمبة جاز او على نور العامود فى الشارع ونجح وخد الدكتوراه وسافر امريكا "

- سّلم على عمك كويس يا ولد

- يابنى ماحدش بينفع حد

- ما تطلعش ايدك من شباك العربيه

- قصة الغريق الكاذب اللى كل مرة يقول الحقونى .. لحد ما غرق بجد

- التهديدات المخيفة شكلاً والكارتونية مضموناً .. مثل :
هاقطم رقبتك او هاقطع ايدك او هاقطعلك لسانك .. او هادبحك دبح

- ربنا يرزقك بعيل يوريك اللى ورتهونى ..

- ما تطلعش على الملايه النضيفه و رجليك متوسخه كده

- حول القناه دى بلاش قلة ادب ومسخرة

- نسيت تشرب ؟ نسيت تاكل ؟ نسيت تقول هاتوا المصروف؟ نسيت تعكنن عليا ؟

- طلع ايدك من جيبك وانت بتكلمنى ..

- يالا يا ابو كحكه حمرا .. انت فاكر نفسك هتاكل معانا؟

- عايز ابص الاقيك قدامى فوراً ..

- ماتتشقاش فى الفسحة وكُل سندوتشاتك كلها

- ادى اللى انت فالح فيه
ودمتــــــــــــــــــــــم
**** اوعوا تنسوا التقييم ****
تحياتى للجميع

[ابوعبدة1]

يسلموا حبيبى طارق
موضوع فى غايه الاهميه
طب حضرتك طرحت 53مثال للتوبيخ وحرق الدم
منتظرين 53 جمله لتقويه عزم الابناء
وتكون هذة الجمل مناهضه للقمع والدكتاتوريه
تحيتى لشخصك المحترم

[الصقر54]

تسلم حبيبى ابوعبدة الغالى
وانتظر منى كل ماهو جديد لدى
وبالذات53جملة لتقوية الابناء
تحياتى لك ابو عبدة
ومرورك نور الموضوع واذادة بريقا ولمعانا

[ميدو الشورة]

[عادل عبد المولي]

يسلموا حبيبى طارق
موضوع فى غايه الاهميه

[الصقر54]

شكرا لكم اخوانى على ردودكم الممتعة

[ابوعلاء عز]

الف شكر اخى على المجهود
لك تحياتى

[الصقر54]

بارك اللة فيك حبيبى قلبى عز باشا

[حيدرالكبيسي]

الله يبارك بيك اخي الغالي

[الصقر54]

الف شكر لك اخى حيدر