اللي شبع بطل كلام ع الحال

[mayzoo]

اللي شبع بطل كلام ع الحال
.. كإنه من شعب تاني ما تهمهوش أحوال
يقعد مع الناس ما يتأثرش بالحاصل
يبص للقاعد جعان يجامله من غير حراره
يتلافى منه السيجارة ويشربها باستخصار
- يحاوره من مدخل شبع -
زمن المفلس وجيد زمن اللي ف إيده وبخيل
" ولا يشرب الدردي إلا المحتاجين للكيف –
ف القهوه ركن اللي واخدين راحه بيتغدوا
، بيفشوا غلب الهموم وبينفخوا ف النار
بيعبوا جوفهم معسل لاجل صد النفس
من قبل رد التحية كفهم ممدود
الصهبجية العدالة السمّاعين العود
أمّات نفس مهدود أهل الكرم والجود
لاقيين كمام الخلق متشمرين للحضن .. ..
.... عكس اللي رافعين صدورهم – فخه كدابه –
متمطعين الكتاف بيلمعوا الجزمه
داخلين في عب الغلابه يتاجروا بالأزمه
رص المعلم كراسي وجهز النصبه
صبيانه رشوا المكان بالميه والرمله
أول زبون اتجعص
كان تاجر العمله واحد دخل يملا
" مانشيت " جرنان أسعار الدولار في السوق
يا خساره مات الجنيه هات شيشه يا معلم
ناس كسبت بضربة نصيب والكسب الحلال مضروب
إدينا كوتشينه
علق .. ، خش .. ، مين مغلوب ؟
فنِّط لنفط السولار ما كفايه رجم الطوب
وقف المعلم يقلب جيب فقير عدمان
رهنوه .. ، خسر .. ، خدعوه .. ، انهزم .. ، رهنوه وباعوه
غشوا الورق غلبوه .. ، لما اتغلب نشّوه
حرب الحجر والبيضه والطوبه وقزاز البيت
محسوب يفوت منسوب يعود جايب معاه خير البخيل
ما تصدقوش النصاص قامت تصحِّي الطوب
الدنيا ليل والنخيل زي القتيل ع النيل
يآخي اصطبح واستنى لما .. القهوه لامه الشمس تحت " الغلاّيات "
والدعم فرّع قرع فوق دجله وفرات
صاحبك خرج ترابيزه فوق منها الحرج تسمح ياأخ
انزل هنا بطلبات صدينا من مص اللمون
مين سد شط القناه وايش جاب لجاب
ملعون أبو القنوات والدش وإرسال الشيطان
ملوا قدسنا استيطان يا ضيعة الأوطان
هدموا الشيشان فوقنا
لِسَّانا من غير لسان .. هزونا لم فُقْنا
اقفل زرار اجتماع موّعنا ع الفاضي
وطي الكلام الرغي بلا فلقة دماغ
حصل انقلاب بطل هباب روح شوف رغيف اتسممه
اتعلموا وبعدين تعالوا ابقوا العبوا
ع القهوه ولا ألفين أبو .. .. ولا فيش ولد .. ..
.. .. شايب .. .. تريس .. .. برضك ترس
على أي حال الصبر مفتاح الفرج ...اخرس يا تور
شحاته ماشيه ف عرض بصره ف عرض نظره بالحلال
هدمتها شايطه من المفيش
بتهش دخانة الحشيش
بتلف ودموع السؤال نزلت على نسر الشاويش
وسط العلم بصمتها فيش
ما تشبّهوش حُر بذليل
رغم العيال فوق باطها ماشيه بالاحتمال
يكفينا لما تهل نشعر إن الست حره
وسابله طرحه مرقعه بخيط الحيا
وكفايه صاره العوزه من لقمه وغموس وقروش في شال
بتمد إيدها لناس بسيطه وحالهاحال
وبرغم شدة فقرها آخر جمال
ما تمدش إيديها لناس بدشداشه وعقال
العب يا خال
العب يا خال
العب يا خال