الساده الاعضاء و زوار منتديات المهندسين العرب الكرام ,
, مشاهده القنوات الفضائيه بدون كارت مخالف للقوانين والمنتدى للغرض التعليمى فقط
 |
|
|
|
|||||||
 |
|
|
أدوات الموضوع | انواع عرض الموضوع |
|
رقم المشاركة : ( 1 )
4/5/2010, 07:15 PM
|
|||||||||||
|
|||||||||||
أشعار/ على سلامة
الشاعر //على سلامة
حاله كده …… معرفش ليه ... تنحت للدنيا كده .. ! وفجأة لقيتني مسكون بالملل ... لاعندي رغبة ف البكا .. ولا في الكلام ... ولا عايز أنام ... ولا حتي بسأل إيه ده ليه .. وآخرتها إيه .. وإيه العمل ....... وأخاف أقول لأي حد …. أحسن يقوم يقلبها جد … حتى صاحبي ينزعج ... يمد إيده جوه قلبه من باب الكرم .. عشان يشاركني الألم ... أو يستلفلي من لئيم حبة أمل .. حالة كده .... معرفش إيه ... ملهاش معاد .. ساعات تزورني ف الربيع .. ف الحر ... وف عز الشتا ... وتجيب حاجات ... لا فيها روح ولا ميته... حالة كده .... لا معاها تنفع كلمتين ولا غنوتين ... ولا لقطة من ألبوم صور .. آلاقي قلبي ف الهوا ويا الكور ... أخاف أقول لأي حد .... أحسن يقوم يقلبها جد .. حالة كده .. معرفش إيه .. لكني بطلع منها بعد السكات .. فاهم شويه ف اللي فات .. حاسس أوي بحضن الصحاب ... محظوظ أنا ... ساعات أشاور ... ينفتحللي ألف باب…كتاب القراءة ... بمنتهي البراءة ... سأليتني … بنتي روان .... ف أربع خمس .. أمور … مش ف كتاب القراءة .... قالتلي .. بابا بابا .. مش إنت .. يا بابا .. بتكتب أغاني .. وتقول أشعار .. أنا سمعت .. الشيخ يا بابا ... بيقول إنك يا بابا … ها تروح النار ... زي الوحشين يا بابا ... الحراميين الكفار .... قوللي يا بابا .... يعني إيه إستعمار .... يعني إيه نيل ... يعني إيه هرم .. ومين اللي حط ... النسر فوق العلم ... يعني إيه يا بابا ... إستفتاء …. و يعني إيه إنتخاب ... ويعني إيه حر ... ويعني إيه نصاب…. يعني إيه إختلاس .. ويعني إيه هجاص .. ويعني إيه خصخصة .. يعني إيه يا بابا .... دستور …. يعني إيه معارضة .. ويعني إيه مظاهرة .. وليه النهاردة ... خدنا أجازة ... م المدرسة ..... قوللي يا بابا .... يعني إيه قهر .. وفين … خط الفقر ... ويعني إيه حظ .. ويعني إيه زهر ... يعني إيه يا بابا ... حريه ….. يعني إيه إنسان .. ويعني إيه سرطان ... يعني إيه يا بابا ... خربوها …. ومين دول يا بابا .. ولاد القطقوطة ... ومين دي ... سمارة يا بابا .... وإزاي يا بابا ... ضاعت من قلبك ... يا بابا ..... إنت معايا .... فيه يا بابا ناس ... بتقول كفايه ... وفيه كمان عساكر ... مسكين عصايا ... وبنات متعورين ... وتانين … ماشين بيضحكوا ... هما دول إسرائلين .. يا بابا ..... ويعني إيه ... ويعني إيه ... قولتلها …. روان ….. ممكن أسألك سؤال قالتلي …. إتفضل يا بابا ... قلتلها …. هيه قناة Space toon ... رقم كام ….. وخدتها ..... عشان تنام اجمل من كده يا ريتني اجمل من كده ........ اطيب و اقوي من كده........... و يا ريتني حاسس بالرضا..... و انا كنت اقولك .................... آه بحبك................................... من زمان اوي كده.................. يا ريتني .................................. فارس علي الحصان.............. و ف ايد فرح........................... و ف ايد امان......................... و لا اتقابلنا من زمان............. في زمن جميل عن كده........ يا ريتني.................................. اجمل من كده........................ علي سلامه خايف أصحى مالاقيش مصر ساعات بقلق بالليل يعني بالليل شوية كده قبل الفجر حسب الظروف كده بعد العصر خايف يوم أصحي وأفتح الشباك مالاقيش مصر ألاقيها لمت هدومها ومشيت لمت هدومها علي نيلها علي هرمها وطفشت وحلفت ميت يمين ماهي قاعدلنا ماهي زهقت تعبت إتخنقت أصلنا زودناها أكننا استعمرناها ورثناها مصر البنوتة الحلوة اللي زي القمر بقت عجوزة وشايبة وبان عليها الكبر خايف يوم أصحي وأفتح الشباك مالاقيش مصرأحب العسل احب العسل واموت فى الكسل ووقت الازمه اقول فى العشق حكمه ومثل وبس خلاص .. اهجص الاقى ميت مليون هجاص افكر...... هس.... ولا صوت ولا ناس لأنى كده ثقافة وعلم يدوب فى الفيلم فى الكراس وراسى زى اكبر راس مفيش احلام مفيش احساس استراحة ع الصحاوي استراحة ع الصحراوي الجو نار سايق ومحدش معايا غيري انا والذكريات وحبة حاجات ازازه الميه ونظرة عينيا اللي شايفها في المرايا بتبص لي من وقت للتاني بغباء كأنها عارفه الحكاية او واخدة بالها من الطريق مر السفر من غير صديق اول شمال احود ولف الغنوه سكتت والشريط عمال يسف وازاي تخاف يا ألم من غير جراحة ادي استراحة دماغي محتاجه الصراحه وقلبي محتاج الحنان اركن هنا اشرب يا عم قهوتك ويلا عشان نلحق مكان قبل الغروب واوعي الردار يسحب ف لحظة غنوتك معدش فاضل في الطريق ولا استراحة وإحنا لسه في إبتدائي وإحنا لسه في إبتدائي وسط اوراقى القديمة اللى لسه منها باقي شوفت صورتى بين زميلى و احنا لسه فى إبتدائي الوشوش كانت بسيطه طاهرة لكن مش عبيطه نرسم الأحلام خريطه فى قلبها نقطة تلاقي هو صاحبى لما كان فى الدنيا صاحب اما دول كانوا جيرانى كل واحد فينا حقق جزء من بعض الأمانى أما دى الشاطرة البليده العنيدة أم الضفاير تبقى حبى الأولانى أد ايه حزنت عليها لما راحت فصل تانى ما احنا كنا تختة واحدة فى تانية تالت مره قلت و هى قالت لما مدت ايدها شالت دمعة وقعت غصب عنى جوه كراسة الحساب كنا لسه صفحة بيضة فى الكتاب الوشوش كانت بسيطة طاهرة لكن مش عبيطة نرسم الأحلام خريطة فى قلبها نقطة تلاقى واحنا لسه فى أبتدائي بكلمك من مصر بكلمك من مصر.. مصر ياسيدي ,,,, مصر.. مصر يا عم مصر.. مصر بالصاد.. مصر كل يوم مزاد.. مصر بنات وولاد.. بتنسرق أحلامهم.. مصر أصحاب المعاشات.. والبهدلة ف آخر أيامهم.. ومصر ناس كل اللي معاهم.. وف قلوبهم ووراهم وقدامهم مصر.. مصر بالميم.. آه واللّه العظيم.. بكلمك من مصر.. مصر بالآه.. مصر كل يوم.. يا حد راح يا حد تاه.. إستطعم الاسم كده.. وإنت بتنطقه.. أو بتكتبه.. أو حتي لسه بتتهجاه.. مصر.. مصر اللي لو يوم تغني من قلبها.. غصب عنك.. ...... لازم تقول اللّه..    لكني باغلط ف الحساب .. ومعرفش ليه تنحت للدنيا كده ... بالصلاه ع النبي احنا عندنا اسمه ايه ده احسن واحد يحلل مبارايات ويحط التشكيل الاساسي والبديل ويقولك امتي تلعب براسين حربه وامتي تلعب من غير راس ولو ضميرك مش مرتاح وعندك احساس بلاش تشوط ع التلات خشبات وعندنا اسمه ايه ده احسن مهندس خبير بيرمش بس للبير يطلع غاز وبترول وينزل دهب م الحنفيات وعندنا اسمه ايه ده احسن سمكري ف التلاتين سنه الاخيره تخش من مجري العيون علي عين الصيره هاتعرفه من مناخيره ومن شكل العربيات وعندنا اسمه ايه دا مجرم قانون دولي ودستور وايده خفيفه قوي ف التعديلات يشيل من هنا ويحط هنا جواهرجي ياربي ملقاط وعندنا اسمه ايه ده احسن واحد يحط الفول علي الطعميه ويعمل سندوتشات وعندنا اسمه ايه ده احسن دكتور مسالك وعظام وقلب وغرام من نظره عينيك يعرف كل الحاجات ولا روشته ولا ابره ولا تحليل ولا اشاعات وعندنا اسمه ايه ده احسن حانوتي اثار ولو جاله برد ابو الهول يموت وتنتحر الاهرامات وعندنا اسمه ايه ده احسن كاتب واحسن مخرج رقص واحسن جزار كوارع وعكاوي وحلويات وعندنا اسمه ايه ده ملوش حل في الزراعه فواكه وحبوب وخضراوات يقول للارض قمح تقوله حاضر ونخبز ونعمل بسكويت وفينو بسمسم وبقصمات وعندنا اسمه ايه ده صاحب القهوه كلنا نتيتم ونتشرد لو بعد الشر زي الناس ما بتموت مات ياخي انا مش عارف لما احنا عندنا اسمه ايه ده واسمه ايه ده امال اسمها ايه دي مصر مبتتقدمش ليه وتعبت وزهقت وداخت ولفت السبع لفات أنا المواطن نقط نقط نقط .. يكون ف علمك أنا مش جبان ... ولا بتهان وأسكت زي زمان .. أنا بصرخ وأكتب وأبعت وأتكلم .. وأسمع بقي يامعلم .. أنا المواطن نقط نقط نقط .. رقم قومي نقط نقط نقط .. محل الأقامة نقط نقط نقط بجوار البنزينة .. بصراحة حرام تعملوا فينا نقط ونقط ونقط .. وتطلعوا نقط و نقط أهالينا .. عملتوا إنتخابات وكلها نقط نقط نقط .. وشيلتوا وحطيتوا حاجات نقط ونقط ونقط .. بصراحة .... أنا بقيت قدام مراتي حاسس إني مش نقط خالص .. وأقول لها نفسي أبقي نقط بجد .. تقوللي يا خويا متحرقش دمك .. محدش بينفع حد .. حسك ف الدنيا .. بكره تبقي نقط ونقط ونقط .. ! 
|
|
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
Google Adsense Privacy Policy | سياسة الخصوصية لـ جوجل ادسنس
^-^ جميع آلمشآركآت آلمكتوبهـ تعبّر عن وجهة نظر صآحبهآ ,, ولا تعبّر بأي شكلـ من آلأشكآل عن وجهة نظر إدآرة آلمنتدى ~
العرض العادي
