[مدحت الجزيرة]

سعد بن علّوش
الانتظار

ما على الدّنيا حسافه .. ولا جرح وعوار
مهما كافحنا نبي نعيش .. بنموت افالاخير
بس قبل الموت .. والحزن .. وانواع الحصار
ودّي اتخلّص من جروح تأنيب الضّمير
( ماجد ) ..!! شلونك ؟ وش اخبارك ؟ أربّك ابخار ؟
وان سألت : أنا شلوني ؟ أنا ماني بخير
من ثلاث شهور وأنا أتعرّض لانصهار
أتكتّل جمر .... لين أتبعثر زمهرير
علّم ( أبو محمّد ) سلالة طوال العمار
علم مايدري بعلمه عمر ولا عمير
قل له إنّي بين فقد الأمل والانتظار
حالتي حاله .. ومتضايق .. ووضعي خطير
وقل له إنّي يوم جيته ترى مالي خيار
وما قتل ( زهير ) إلاّ ( بنو خالة زهير ) ..!
وقل له إنّي جيت متردّد وضايع قرار
وصغّرتني حاجتي .. والاّ أنا ماني صغير
وقل له إن بعده يعادل ثمانين انكسار
وقل له إنّه غير والله ... والشّيخان غير
وقل له إنّ الطّيّب اللّي سواتي ما يضار
وقل له إن الطّيب لاهو يضار ولا يضير
وقل له إن الليل لابد تاليته نهار
والشّهيق أكيد بيصير من عقبه زفير
وقل له إنّي مابي ألاّ رضاه وباختصار
وقل له ايركّز على قراية البيت الأخير
الكبير تجي جروحه من احبابه كبار
ليت ربّي ما خلقني بأحاسيسي كبير