نشيد الأراجوز
الأراجوز يا سلام سلّم
الأراجوز
له ألف حاره و ألف ميدان
و مالوش عنوان
له فرد و جوز
نبوّت و لسان
شمروخ ولسان
دا جنب دا على حسب العُوز
بالمرّه كمان
أنا يا أخوان
ضحكتي بِسْنَان
و لا ضحكة الصين من فرموز
بالمرّه كمان
باتْني الخرسان
و مزاج فنان
باعمل من المسمار قلاووز
بالمرّه كمان
طرزان خرزان
ع النقربزان
باضرب سلام و باقشّر موز
بالمرّه كمان
أهوى النسوان
ست أم فلان
فُرْقُع ما فرقع قلبها لوز
بالمرّه كمان
خِلْقتي إنسان
و عيداني عيدان
من أرض مصر ضَمَنْت الفوز
بالمرّه كمان
حيّوا الجدعان
بالمره كمان
نَسُّوني زمان
بالمره كمان
تحيا الأوطان
بالمره كمان
يحيا الأراجوز