سبع عجايب يا زمن
سبع عجايب يا زمن
وادى كمان عجوبه
مين لبسك عريان
ف عز برد طوبه
تصدرى الغاز ببلاش
وتدورى ع الانبوبه
والدنيا تجرى وتجرى
وانتى لسه بتحلمى بزقه يا زوبه
الله يرحمك يا خالتى ام سعيد
كانت تكشف راسها للسما
وتقول روح روح
الهى تنشك ف عينك يا بعيد
بتدعى ع الخضرى
اللى نسى يمسح كفة الميزان
ياترى لو كانت لسه عايشه معانا لحد لوقتى
وشافت وطن بحاله بيتسرق
كانت مانت من الحسره
ولا قالت مع الكروان
الملك لك واحدك يا صاحب الملك