الشَعْرَة الهلالية
الضحك يقول
انا شيخ زغلول
و ابو زيد بهلول
و جحا فتوّه
مصري و بالذوق غَلَب القوّه
الباشا زمان و زمان طوِّل
كان بيقول عني متسول
زرع الفجله عَلَف العجله
إدي له نكله يمشي يشخلل
قلت قابلني لمّا أصهلل
توبي مهلهل وشِّي يهلل
انا قرن الفول
أهجم ع الغول
قاتل مقتول
يا انا يا هوَّه
انا شيخ زغلول
و ابو زيد بهلول
و جحا فتوّه
مصري و بالذوق غَلَب القوّه
إن كنت باذاكر فى تاريخنا
على مركب و التاني فى ريحنا
تلاقيني باجمّع ملامحنا
و اطلع بالقلب و بالسحنه
و باقاوح نَفْسي و باقوحنا
بادَّحرج على جبل المحنه
و باقع معدول .. خالي و مشغول
أخضر على طول
برّه و جوّه
انا شيخ زغلول
و ابو زيد بهلول
و جحا فتوّه
مصري و بالذوق غَلَب القوّه
وادّي بُنيَّه للجبونيه
و القُف نبابيت الحسينيه
مولود على راس الحنيّه
لابس قمصانها اللبنيه
باخنقها على نفس النيّه
مين فينا شعار الوطنيه
مين ابن أصول
ويصول و يجول
لابس جلجول
و قُلُنْسُوَّه
انا شيخ زغلول
و ابو زيد بهلول
و جحا فتوّه
مصري و بالذوق غَلَب القوّه