المهندسين العرب - كل البيوت ف الصبح لون واحد

كود:

قصيدة شعر بالعاميه فى منتهى الجمال لوصف الريف المصرى فى الصباح

كل البيوت ف الصبح لون واحد

الفجر داخل بيرمي الضلمة ورا ضهره

خد الورق ف الغيط – ملدن – والفروع(متنقرشة)

قمر الدروب ريح في ( غلق ) البوابات

" كباس " " بابور " بيور ن وتوش ( الكوش )

كل السطوح متونسة بصوت " الديوك " ..

نفس الحريم..صوت(الصحون ) .. خبط(الحلل) ..

دايبين في ( وأ وأة ) العيال .

باب الفقير زيق – تتسحّب البتّ اللّي بتلمّ" الوقيد"

حريم ( كبّارة ) لابسة اسود

و " سابلة " الطرحة فوق راسها

تطلع وترجع شايلة " الجرّة " .. مبلولة الهدوم

تدخل تحايل طفل مفطوم في النهار ..

" غيران " من الطفل الجديد .

2 – يتأوه – العضم – الكبير

نايم وخايف من " زيارة " " عزرائيل " ..

يسمع أدان الفجر يحمد ربنا

يهرب ويخرج في ( الونس ) !!

يفرش قبال الباب ويلقط في النفس

على نفس مطرح كل يوم يقعد(يصور)في (الوشوش)

.. يكح ، ويرد السلام

نفس المكان اتقص من فوقه الكفن

.. كنسوا التراب واستقبلوا الناس للعزا

نشوا الكلاب علشان بتنبح في ( الصوان ) .

تهدا – الكلاب – وتمد"بوزها"وتتخمد تحت الحيطان

باب ( يتورب ) تتكب مية لاغتسال بلا أي صوت

( يستنطق ) الشباك في ( بيت عالي ) ..

.. مية نجس ليل الغناوي ..

تتبط ع الأرض تفرش " طرطشة "تزوم الكلاب..،

وتقوم وتنفض شعرها وتزغر لشباك الغني !!

تصحى الطيور – في العش – تتهز الفروع

"تتمطع"النخلة اللي حانية الجذع..تنصب ضهرها

تتمد إيد " السباطة " وترمي فض الله

في " الكَرْم " لف الجنايني ولقط " المقروش " ..

وعدى ع التعريشة عسعس في العنب

ـ يلعن في سره ـ " المن " والسوس في القصب

ميّل سند جسمه بكتافه وشد حبل الذكريات

فينك يا بو القردان ؟!

فينك"يا بو القردان" تلقط دود من الغيط والبيوت

رجعنا م النص ما رجعناش من الأول

اتعقّد الأمر والحل اللي جاي طول

اتحل وسط البلد اتبدلت لاحوال

الساعة وقفت ع الغلط واتحزم الرقاص

" الودن " " طبلتها " – خنّت – م الصدا والغش

إتألّف الموال بناس غشوا التراث

فينك يا بو القردان ( تبيض ) جنب الخيال ..

.. يعدل " خيال المقاته " اللي اتكسر وسطه

ما عدش وقت الحصاد أولاد بينبسطوا

خولي " الكروم " بصباص ، صدر البنات خباص

اتفرقوا الأنفار " والعت " خد ع الفار

فينك يا ابو القردان تخدم مع الشبان

وتشجع الأطفال ( وتوبخ ) الخولي

" نَزَحُوا " " الزيار " والسبيل ما عدش فيه " ميه "

الخولي صاحب الغفير والقطن بيهرّب

ما تْرَوَّحُوش يا بنات ، في مرور في ( المغرب )

ضِرع الجاموس خوّاف لو شاف أمان يحلب

فينك يا بو القردان

أَمَلِّيك الكلام تكتب !!!!

************

نــــذر

تحت ( الدكك ) .. فوق " الحصير " تتنطط العياييل

صاحب الفرح نزل " صينية الجنزبيل "

وزع ونبه " للمريد " على ( شاي تقيل )

قام ( شيخ طريقة ) ومرر " شفطة البركة "

( عمر المباحث ) لم قفطانه الحرير .. ..

.. قال ( هوو ) وصقف افتتح

ع الصقفة لم البعترة وكله استعد

اصطفت " الذكيره " ع الجنبين

كبار السن – تانيين الركب – متربعين آخر أدب

" درويش " نفخ في المبخرة ، " وعبق " البخور ..

.. بيغازل " التنورة " من كل اتجاه

استفتح المداح بذكر الله وصلى ع النبي

ـ محسوب ـ نده سدنا الولي يا بو الحسن يا شاذلي

إترصصوا الإخوان شمال يمين ويمين شمال

فكو الجلوس وقفوا بإيدين متشبكة

وبعد البكا والنهنطة سكت الواد

إسم " الحسين " ف الذكر بيشد المدد

" يأم العواجز " والحسب فوق العتب أيتام

مددين يا طاهرة وميت مدد يا ابن بنت الزين

القلب طفطف واللي ترجم واللي ريم واللي هآم

متحسبين يا آل المصطفى

نسوا كل شيء ظاهر وبان ما قد بطن

سيدنا النبي مسك الختام

جابواالولد ملفوف بشالجأمهج– القطيفة –ف حضن ابوه

فوق وشه هالة نور في باطه بيبتسم

شاله المريد وتلا القسم وختم وهجوا الذكارين

نقوا " الطواقي " ولقطوها ولبسوها لبعضهم .. ..

جمعوا " الشيلان " لفوها واتلقط النفس

نشف العرق"والنفحة"دارت ع الجميع واتوزع الشربات

مسحوا " الوشوش " بِـ" الكُم "وبطرف"التواب"

دار النقوط واترشت الزغاريت من الشبابيك

والبسملة من تحت ( الطرح ) تِرْقِي الفرح

"اتصبت"القهوة لكبار السن والشيخ والضيوف المنقولين

واستأذنوا المستعجلين واتسحبوا ورفضوا "البيات"

فرشوا السلام ع الموجودين وانشالله عقبال كل عام

أجدع سلام " يالله تجاملوا الحبايب في ليالي الهنا "

السهرانين طلبوا استماع وصلة طرب

ـ صلى الله على محمد صلى الله عليه وسلم ـ

ـ وصلي صلي.. صلي ع النبي صلي صلي ـ

وقف المريد قال حي والذكر ابتدا

والسهرة طالت ( والكلب ) احتاج نفس

هدوا البطانة الرد والرتم استراح

ختم المريد وطلب(قراية)الفاتحة م الناس بالسماح

( غمض ) ووحد ربنا وفتح وصلى ع النبي ،

وبسمل وصدق وادعى لليلة ولصاحب الفرح

زطلب لكل الموجودين الصحة والعمر الطويل

بعد العشا اتعد النقوط

ومع السلامة ونلتقي العام اللي جاي لو فيه أجل

والفاتحة لصاحب المقام

فتح المزين شنطته وقعد الولد ( فوق الما جور )

ومدد يا رفاعي

مدد يا بن رامه

مدد يا شاذلي يا صاحب الكرامه

لا الفرح دام ولا الذكرى حنت كل عام للإبتسام

والكل من بعضه اشتكى

والمبخرة بدون مستكة

ولا ربع مفارق زنقوا وضاق الطريق

لون الملامح ف الزحام بقى ألف لون

ماتوا الكبار والشيخ ونص المعزومين

والسقا وبتاع البخور !!

ابتهــــاج

أنا وهيه ف كتاب واحد

وكانت بتلبس " إيشارب " منقوش بلون"الطاقية "

وتعدي ضافرة الضفاير ( بفيونكة) لون ( الزراير )

حاوطتني من كل ناحية – أسرتني – قفلت عليّا

أمسك تسيب أصغر تشيب أقرب تغيب

أنده تجاوب من بعيد مقدرش أعود !!

يا مـّ الشعور شعرك طرف عين القمر

" شالك " ما عدش يدلني لسكة هوا

أرجوكي لما نكون سوا ما تصحّينيش

ما تحركيش قلب " القضا " ف صدر " القدر "

سيبي الدموع متحجرة ف عيني اليمين

متفجرة ف عيني الشمال

خايف أدمع – أنزفك – يا أبهج الأحزان

كان اللي كان يا مفرقة الأزمان

في الفصل في السكة – دايماً – إسمي جار إسمك

خلاص ما عدش التناغم في الكلام والشكل

قَسِّمْتِي نفسك ما عدّتيش تعملي حسابي

داريتي عين البراءة ( بنضارات ) سودة

كبرتي قصرتي شعرك حليتي مسخ الهزار

مصلوب في سجرة سنينك بحث عن إسمك

عيني ف قديمك بتحلم والجديد ذكرى

طول عمري عايش معاكي وبيكي وف دمي

لا كنتي من أهلي ولا كنتي أختي ولا أمي

إنسي النهاية اللي صارت هاتي مـ الآخر

البسملة في " النار " طرية وكلمتك ( سندال )

إنسي الخصام اللي صار عاودينبي للأول

في السكة نطلع حبايب لبيوتنا نرجع " خوات "

حبك ما كنش بصور ولا بينا كان جوابات

ياللا انفضيني من الحنين

واستقبليني بحب كان ميّت وجاي !!

***********

النخلة ما بترميش رطب

أول ما نبدي القول

نقول

صلوا على .. ..

مسك الختام ميكونش قبل البسملة

آه يا بلدنا يا بلدكم يا وله ..

سور الحقيقة مطولة

لا النار بتمسك في اللي عنده هدوم ولا .. ..

النيل دليل الغرقانين ساكتين ولا .. ..

الطين ضمير العرقانين في الغيط ولا .. ..

كل (الخشوم) بتصوم – إيمان – اليوم ولا .. ..

تكبر ديوك البيت وفاضية الحوصله ..

تكبر عيال اليتم جوه المريلة

ترقص بنات الفكر فوق المنجلة

آه يا بلدكم يا بلدنا يا " بلا "

لا " البحر " قادر يطفي جوف الغلغلة

ولا حد فاهم سر حل المسألة

يا شعب صابر ع الغلا

" ما ودعك رب العباد وما قلى "

فيه ناس كتير آه يا بلد يا مطبله ..

دافنين عقولهم في الرمال زي النعام

والطفل نايم ف التراب – تحت – الزحام

بتفوت هموم ( تبصم ) في دفتر قيد ميلاد المولودين

والخلق ضاق جوه الخلق

أزمات كتير والسكة ضاقت ع الولد

والشيلة تقلت والكتاف رافضة الهدد والأزمة بتشد المدد

خدم الكبار بيهزَّؤنا ونُحْتَقَـر .. .. ..

.. .. ، ويعبوا بينا المعتقل

ناس وارتضوا نعيش محرومين

ضاق الماعون ولا فيش فضار

إن نمنا واكلين " نحمضوا "

وإن نمنا بالجوع نحمده

ولا عدنا قادرين ننهضوا

امتى اليومين دول ينقضوا !!

امتى اليومين دول ينقضوا ؟!؟

الضرب على البطن ابتدا

ومالناش ( ضهور )

وضهورنا من ضرب البطون صبحت " قفا "

شبعان تفور – زي القدر – فوق ( الكانون )

والسوس نخر عضم الكافور

وبنات ( بترفع ) صوتها في الحزن القديم

بيتنا اتنقل من بيتنا والوضع انقلب

بابنا اتورب والارض لسه بـ تُغْتَصَبْ

و لا عاد لهب يطفي الغضب

ولا غاد غضب يطفي اللهب

الغيط " نضب " والنخلة ما بترميش رطب

والبت بتلم الحطب والعصمة في إيد ( الديب )

يا شعر اوعى تغيب .. ..

.. .. وكفاية بعد سنين رجعت عرفت مين ..

.. .. سرقوا و ( مضوا )

.. .. خطفوا و ( مضوا )

ناس وارتضوا نعيش محرومين

يا خوانا خايفين ننهضوا

إمتى اليومين دول ينقضوا

إمتى اليومين دول ينـ .. .. قضوا !؟!