المهندسين العرب - ابيات اغلى من الذهب

ابيات اغلى من الذهب
هذي ستة عشر وصيه من وصايا الأولين
{ الأوله }
اترك مسافة كافية بينك وبين الآخرين
بعض البشر ودك حدود المعرفة معهم سلام
{ والثانية }
اصمت ولاتحرص على كثر الكلام
الصمت زين اللي سكوته ساتره يمكن يعَريِه الكلام
{ والثالثة }
إذا تكلمت احذر تكون أطول المتكلمين
السالفة لاطولت يضعف معاها الاهتمام
{ والرابعة }
أمزح ومزحٍ باللسان أخير من مزح اليدين
مزح الرجال العاقله على حدود الاحترام
{ والخامسة }
اضحك ولاتضحك برفع الصوت رفع الصوت شين
من الأدب والذوق عند الضحك ضحكٍ بابتسام
{ والسادسة }
أكرم وبيبان الكرم واجد ولا يحتاج دين
وترى الرجال إكرامها ماهوب في كثر الطعام
{ والسابعة }
احلم ولا تعجل ولا تغضب ولا تشري بدين
وشاور ولو رأيك معك لا شرت عداك الملام
{ والثامنة }
إذا شريت بدين لاتبطي على المتجملين
كلٍ حلاله غاليٍ عنده لو إنه مايسام
{ والتاسعة }
لاجاك مديونك معه بعض الوفى وبعضه لحين
فأستد باللي جاك وش دراك لله الدوام
{ والعاشرة }
ترى التغافل فيه لذه وانشد المتغافلين
وإن جات كلمة توجع أطلقها مع سرب الحمام
{ والحادية عشر }
أرضى ليا جاك الرضى لو العذر ماهو سمين وترى التسامح ميزة السادة رفيعين المقام
{ والثانية عشر }
أصدق مع نفسك وتلقى نفسك من الصادقين
والنفس خيل أبليس لاتعطيه نفسك واللجام
{ والثالثة عشر }
ليانصحت انصح خفى لاتفضحه فالحاضرين
ترى الرجال يقودها لين الحكي قود الخطام
{ والرابعة عشر }
إذا تسولف عن طموحاتك مع المتفرغين
كنك ️تسولف للنصارى فالحلال وفالحرام
{ والخامسة عشر }
العمر ماهو فرصةٍ وحدة ولاهو بفرصتين
مع كل مطلع شمس️ لك فرصة وخطوة للأمام
[ والأخيرة ]
لا زالت تعلمنا الليالي والسنين
والعلم خير من الجهل والنور جلاي الظلام